Эртең, 31-августта Садыр Жапаров Кытайга иш сапары менен кетет

Президент Садыр Жапаров Си Цзиньпиндин чакыруусу менен 31-августтан 3-сентябрга чейин Кытай Эл Республикасына иш сапары менен барат. Бул тууралуу бүгүн, 30-августта президенттик администрациясынын тышкы саясат бөлүмүнүн башчысы Сагынбек Абдумуталип билдирди.

“Сапардын алкагында Садыр Жапаров Шанхай кызматташтык уюмуна мүчө- мамлекеттердин башчыларынын кеңешинин кезектеги жыйынына катышат. ШКУга мүчө мамлекеттердин лидерлери уюмдун алкагындагы көп тараптуу кызматташтыктын маанилүү маселелерин, ошондой эле аймактык жана эл аралык саясат маселелерин талкуулашат.

Тяньцзин саммитинин жыйынтыгында Уюмга төрагалык Кыргызстанга өтөт, буга байланыштуу мамлекет башчысы саммитте биздин өлкөнүн Шанхай кызматташтык уюмундагы алдыдагы төрагалыгынын артыкчылыктарын тааныштырат. Жогорку деңгээлдеги жолугушуулардын жыйынтыгында Тяньцзин декларациясына кол коюлат. Ошондой эле ШКУга мүчө мамлекеттердин саясий, экономикалык, энергетикалык жана башка тармактардагы өз ара аракеттенүүсүн бекемдөөгө багытталган макулдашууларга жана документтерге кол коюу пландаштырылууда.

Анын алкагында Жапаров экинчи дүйнөлүк согуштагы Жеңиштин 80 жылдыгына карата салтанаттуу иш-чараларга катышат. Ошондой эле Кытайдын төрагасы Си Цзиньпин менен жолугушуу болот", - деп белгиледи Сагынбек Абдумуталип.

Айта кетсек, бүгүн, 30-августта Эгемендүүлүктүн 34 жылдыгы Жалал-Абад шаарында белгиленет. Ага президент Садыр Жапаров катышат.