Шарттары укмуш. Сузакта президенттин катышуусунда мектептин жаңы имараты колдонууга берилди

Бүгүн, 30-августта президент Садыр Жапаров Жалал-Абад облусунун Сузак районунун Миң-Өрүк айылында Нышанбай Алыкулов атындагы жаңы мектептин ачылыш аземине катышты. Бул тууралуу мамлекет башчысынын басма сөз кызматы билдирди.

Мамлекет башчысы азыркы учурда мамлекет биринчи кезекте келечек муунга кам көрүшү керектигин белгиледи.

“Айыл болобу, шаар болобу окуучуларыбыздын мыкты окуп чыгышы үчүн оболу мектептердеги абалды: эскилерин жаңыртып, кошумча имаратка муктаждарына жаңы корпустарды салып берип, оңдоп жатабыз. Мындай камкордук Нышанбай Алыкулов атындагы мектепке да көрсөтүлдү. Мектептин жаңы имараты заман талаптарына жооп берет, балдардын билим алуусу үчүн бардык шарттар түзүлгөн", - деди президент.

Мурда мектептин имараты эки корпустан турган. 1890-жылы имараттардын бири 10 бөлмөгө ылайыкталып курулган. 1928-жылдан баштап ал кайрадан жабдылып, 10 класстык бөлмөсү бар мектеп катары колдонула баштаган. Текшерүүнүн жүрүшүндө курулуш материалдары көп жылдык пайдалануудан улам эскирип кеткени аныкталган: пайдубалы чөгүп кеткен, ал эми негизги дубалдарда жаракалар пайда болгон, ошондуктан мектептин жаңы имаратын куруу чечими кабыл алынган.

Жапаров окуучуларга алардын оргуштаган билимге, улуттук дем-күчкө тунуп турушун, жалпы мугалимдер жамаатына албан-албан ийгиликтерди жана жаңы мектептин багыт алган жолу байсалдуу болушун каалады. Ошондой эле жаңы мектептин имаратын, анын ичинде окуу класстарын, спорттук жана жыйындар залдарын, ашкана жана башка бөлмөлөрдү көрүп чыкты.