Кара-Сууда зордуктоого шетелген жаран милицияга пара берип жатып кармалды

Ош облусунун Кара-Суу районунда милиция кызматкерине пара берген жаран кармалып, ага карата кылмыш иши козголду. Бул тууралуу бүгүн, 30-августта ИИМдин маалымат кызматы билдирди.

Маалым болгондой, 29-августта Кылмыш-жаза кодексинин 154-беренесине (Зордуктоо) ылайык козголгон кылмыш иши боюнча шектүү катары суралып жаткан жаран маселени оң жагына чечип берүү максатында милиция кызматкерине 25 миң сом акча каражатын сунуштаган.

Аталган факты боюнча Кылмыш-жаза кодексинин 345-беренеси (Пара берүү) боюнча кылмыш иши козголуп, ал акча каражатын берип жаткан жеринен кармалды. Шектүү Өзгөн шаарынын тургуну 1988-жылы туулган Т.А. аттуу жаран.

Учурда ал убактылуу кармоочу жайга киргизилип, тергөө иштери уланууда.