АКШ соту Трамптын киргизген көпчүлүк тарифтерин мыйзамсыз деп тапты

АКШнын Колумбия округундагы федералдык апелляциялык соту президент Дональд Трамп өз ыйгарым укуктарынан аша чапканын жана көптөгөн тарифтерди мыйзамсыз негизде киргизгенин аныктаган чечим кабыл алды. Бул тууралуу чет элдик басылмалар жазышууда.

Соттун чечиминде белгиленгендей, эл аралык өзгөчө экономикалык ыйгарым укуктар жөнүндөгү мыйзам (IEEPA) президентке өз алдынча салык жана бажы төлөмдөрүн белгилөө укугун бербейт. Мындай чечимдерди Конгресс кабыл алууга тийиш.

Бул чечим май айында АКШнын эл аралык соода боюнча федералдык соту чыгарган корутундуну да колдойт. Ал сот дагы президенттин бул жааттагы ыйгарым укуктары "чексиз болбошу керек" деп белгилеген эле.

Сот Трамптын администрациясына Жогорку Сотко кайрылуу мүмкүнчүлүгүн берүү үчүн тарифтерди 14-октябрга чейин күчүндө калтырды.

Бул арада Дональд Трамп чечимди кескин сынга алды.

"Тарифтерди жокко чыгаруу — бул АКШ үчүн өкүнүчтүү чечим болот. Бул биздин каржы коопсуздугубузду жана экономикалык күчүбүздү алсыратат", - деди Трамп.

Ошондой эле Трамп бул тарифтер америкалык жумушчуларды жана ишканаларды коргоп жатат деп белгилеп, аларды жоюу өлкөнүн экономикалык коопсуздугуна сокку урат деп кошумчалады.