Түштүк Корея Түндүк Кореяга багытталган үгүт-насаат программаларын токтотту

Түштүк Корея Түндүк Корея менен мамилени оңдоо максатында анын аймагына багытталган үгүт радиопрограммасынын көрсөтүлүшүн токтотту. Бул тууралуу Yonhap агенттиги кабарлады.

Агенттиктин белгилешинче, бул кадам Түштүк Кореянын Пхеньян менен диалогду жандандырууга убада берген президент Ли Чжэ Мёндун аракети менен байланыштуу. Бул Сеул тараптан жасалып жаткан элдешүүчү кадамдардын бири болуп саналат.

"Коргоо министрлиги эки Кореянын ортосундагы аскердик чыңалууну азайтуу аракетинин алкагында “Эркиндиктин үнү” аттуу программаны токтотту",- деп билдирет Түштүк Кореянын аскердик мекемеси.

Эске салсак, бул радиопрограмма аркылуу жаңылыктар жана K-pop (кореялык популярдуу музыка) ырлары эфирге чыгарылып келген. Өзгөчө, былтыр "Эркиндиктин үнү" Түндүк Кореянын аскерлери Украинанын согушуна Орусия тараптан катышуу үчүн жиберилгени тууралуу маалыматтарды тараткан.

Yonhap агенттигинин маалыматына ылайык, бул программа 2010-жылдан бери биринчи жолу токтотулду.