Израил ХАМАСтын басма сөз катчысын жок кылганын жарыялады

Ишемби күнү Газадагы соккудан кийин Израил "Изз ад-Дин аль-Кассам бригадалары" деп аталган ХАМАСтын аскердик канатынын расмий өкүлү болгон Абу Убайданын өлтүрүлгөнүн жарыялады. Ал дээрлик жыйырма жыл бою топтун атынан билдирүү жасап келген.

Израилдин коргоо министри Исраэль Кац бул операцияны "кемчиликсиз" деп атап, армия менен чалгындоо кызматын куттуктады. Бирок ХАМАС азырынча анын өлүмүн расмий тастыктай элек.

Хутайфа аль-Кахлут - Абу Убайда деген согуштук каймана аты менен таанылган. Ал дайыма бетин жаап билдирүү жасап келген. Эгер ал чын эле каза болгон болсо, бул ХАМАС үчүн чоң символикалык жоготуу болмокчу.

Жума күнкү акыркы билдирүүсүндө Абу Убайда Израилде калган туткундар ХАМАС жоокерлери менен бирдей тагдырды баштан кечирерин айтып, Израилди Газа шаарына пландалган чабуулдун кесепеттери тууралуу эскертүү берген.

Жергиликтүү журналисттердин маалыматына караганда, Израилдин Газа шаарындагы көп кабаттуу үйгө жасаган аба соккусунун кесепетинен кеминде жети адам каза болуп, 20 адам жаракат алган, каза болгондордун арасында балдар да бар.