Бүгүн, 1-сентябрда Бишкектин мектептеринде биринчи коңгуроо кагылды. Бишкек шаарынын мэри Айбек Жунушалиев "Ак-Бата" конушунда жайгашкан №43 мектептеги салтанаттуу линейкага катышты.

Шаар мэри окуучуларды Билим күнү жана жаңы окуу жылынын башталышы менен куттуктады.

"Мектеп бул жөн эле имарат эмес, ал билим, тарбия жана келечекке жол",- деп белгиледи ал.

Жаңы курулган №43 мектеп 650 орунга ылайыкталган. Жалпы аянты 5 миң чарчы метрден ашык, 22 окуу бөлмөсү, анын ичинде 6сы башталгыч класстар үчүн. Бул мектептин расмий ачылышы 29-августта президенттин онлайн форматта катышуусунда Кыргызстан боюнча пландалган 100 социалдык объекттин ачылышынын алкагында өттү.

"Быйыл борбор калаабыздагы 120 мектепке 260 миңден ашык окуучу, анын ичинен 1-2 - класска 39 миңден ашык окуучу барды. Биз келечек ээлери болгон балдарыбыздын татыктуу билим алуулары, ар тармактуу өнүгүүлөрү үчүн бардык шарттарды түзүүгө болгон аракетибизди жумшап, жылдан-жылга мектептердин санын көбөйтүп, жаңы мектептерди куруп жатабыз. Өлкө башчыбыздын колдоосу менен акыркы жылдары 15 мектепке кошумча корпус курулуп, 9 жаңы мектеп салынды",- деп белгиледи калаа башчысы.

Ошондой эле Айбек Жунушалиев мугалимдердин үзүрлүү эмгеги, билими жана мээнети үчүн ыраазычылык билдирди.