Кыргызстандын футбол боюнча курамасы Оманга утулуп калды

Кыргызстандын футбол боюнча курамасы Оманга 1:2 эсебинде утулуп калды. Мелдеш бүгүн, 2-сентябрда CAFA Nations Cup 2025 эл аралык мелдешинин экинчи турунун алкагында өттү.

Оюндун биринчи бөлүгүндө коргоочу Тамирлан Козубаев эсеп санын ачты. Беттештин экинчи бөлүгүндөгү Эрбол Атабаев жана Кожо Жоэль дарбазага киргизген голдору башкы калыс тарабынан, тилекке каршы, саналган жок.

Ал эми атаандаштар экинчи бөлүккө кошулган мүнөттөрдө мүмкүнчүлүктөрдү пайдаланып, эсеп санын теңеп жана алдыга чыгып кетүүгө да жетишишти.

Белгилесек, курама турнирдин «А» тайпасында Оман, Түркмөнстан, Өзбекстан курамалары менен бирге орун алган. Ал эми Иран, Индия, Ооганстан жана Тажикстан орун алган «B» тайпасынын беттештери кечээ күнү Дүйшөмбү шаарында (Тажикстан) өткөн. Улуттук кураманын кийинки беттеши Өзбекстанга каршы 5-сентябрда орун алат.