Садыр Жапаров Пекинде Жеңиштин 80 жылдыгына арналган парадга катышты

Бүгүн, 3-сентябрда президент Садыр Жапаров Кытайга болгон иш сапарынын алкагында ардактуу конок катары Пекин шаарындагы Тяньаньмэнь аянтында Экинчи дүйнөлүк согуштун аякташынын жана андагы Жеңиштин 80 жылдыгына арналган парадга катышты. Бул тууралуу президенттин басма сөз кызматы билдирди.

Парадга чет өлкөлөрдүн 20дан ашуун мамлекет жана өкмөт башчылары катышышты.

Иш-чаранын алдында делегация башчылары Император сарайынын жанында биргелешип сүрөткө түшүштү.

Андан соң лидерлер Тяньаньмэнь аянтындагы парадга катышуу үчүн байкоо аянтчасына жөнөштү.

Салтанаттуу жүрүштүн башында мамлекеттик тууларды көтөргөн аба эшелондору учуп өттү. Андан кийин жөө аскерлердин параддык бөлүктөрү, аскердик желектерди алып жүргөн бөлүктөр жана Кытайдын аскердик техникаларынын колонналары өтүштү. Парадды аскердик учактардын эскадрильясынын учуусу аяктады.