Депутат Исаева азербайжандык ырчы Роза Зергерлиге Ыраазычылык кат тапшырды

Бүгүн, 3-сентябрда Жогорку Кеңештин депутаты Жамиля Исаева Азербайжандын белгилүү ырчысы, режиссёр Роза Зергерли менен жолугушту. Бул тууралуу парламенттин басма сөз кызматынан билдирди.

Маалымдалгандай, Бишкек шаарында жакында өтө турган концертине ийгиликтерди каалаган Жамиля Исаева Жогорку Кеңештин атынан Роза Зергерлиге Ыраазычылык кат тапшырды.

"Сиз Азербайжан элин гана эмес, жалпы түрк дүйнөсүн талантыңыз менен даңазалап, маданий байланыштарыбызды өнүктүрүп келесиз. Жараткан эмгектериңиз, аткарган ырларыңыз кыргызстандыктардын да кызыгуусун жаратып, өнөрүңүз менен боордош эки элдин байланышын бекемдей алдыңыз”, - деди эл өкүлү.

Өз кезегинде Роза Зергерли кыргызстандык күйөрмандарына талантын тартуулап жатканына кубанычта экенин айтып, алгачкы “Мейкин Азия” сынагына калыс катары катышып кеткенин эске салды. Ошондой эле боордош элдердин, анын ичинен Кыргызстан менен Азербайжандын маданий алакасын чыңдоо чыгармачылыгындагы башкы максаты экенин кошумчалады.