Көлбаевдин жакыны, криминалдык авторитет "Узун Улан" Москвадан кармалды

"Узун Улан" каймана аты менен белгилүү болгон 47 жаштагы криминалдык авторитет кармалды. Бул тууралуу Ички иштер министрлигинин басма сөз кызматы билдирди.

Маалыматка ылайык, ал сентябрь айынын башында Орусиянын Москва шаарынан колго түшкөн. Шектүү оор кылмыштарды жасаган үчүн мурда бир нече жолу соттолгон жана мамлекеттер аралык издөөдө жүргөн.

Ал уюшкан кылмыштуу топтун активдүү мүчөсү катары ИИМдин ыкчам каттоосунда турат. 47 жаштагы киши маркум Камчы Көлбаевдин эң жакын жана ишенимдүү адамы болгон, анын жеке коопсуздугун карап келген. Бир нече жолу криминалдык чыр-чактактарга катышкан. Андан сырткары "общак" кылмыш казынасын толтуруу максатында ишкерлерден коммерциялык фирмаларды жана кыймылсыз мүлктөрдү опузалоо менен тартып алып турган.

Ал 2019-жылы Бишкек шаарында башка бирөөнүн өзгөчө ири өлчөмдөгү мүлкүн ээлеп алууга жана каракчылык менен кол салууга айыпталууда. Жабырлануучу чет өлкөнүн жараны болгон ишкер.

Учурда ал Москвадан Бишкекке милиция кызматкерлери тарабынан алынып келди. Тергөө иштери уланууда.