Зеленский Парижде Стив Уиткофф менен жолугушуу өткөрөт

Украинанын лидери Владимир Зеленский Парижде өтүп жаткан Украинаны колдогон өлкөлөрдүн "Каалоочулар коалициясынын" жыйыны алкагында АКШ президентинин атайын өкүлү Стив Уиткофф менен өзүнчө жолугушуу өткөрөт. Бул тууралуу чет элдик басылмалар жазышты.

Маалым болгондой, бул жолугушуу 18-августта Вашингтондо өткөн сүйлөшүүлөрдүн уландысы болмокчу.

Ошол эле учурда Орусиянын ТИМ башчысынын орун басары Михаил Галузин орус журналдарынын бирине берген маегинде Орусия Украинага коопсуздук кепилдигин берүү маселеси боюнча иштөөгө даяр экенин, бирок бул үчүн Украина ядролук куралга ээ болбошу, аскердик блокторго кошулбашы жана нейтралдуу мамлекет бойдон калышы керектигин белгилеген.

Галузиндин айтымында, Москва украин кризисин эртерээк жөнгө салууга кызыкдар жана дал ушул себептен түз сүйлөшүүлөрдү сунуштаган. Ал өз сөзүндө АКШнын бул процесстеги аракеттерин да белгилеп, Владимир Путин менен АКШнын президенти Дональд Трамптын Анкоридждеги жолугушуусунан кийин оң динамика пайда болгонун жана анын уланышына үмүт артыларын кошумчалаган.