Америкалык актёр Стивен Сигал өзүн орус деп эсептей турганын айтты

Америкалык актёр жана Орусия менен АКШнын ортосундагы гуманитардык байланыштар боюнча Орусия ТИМинин атайын өкүлү Стивен Сигал өзүн орус деп эсептей турганын билдирди.

"Мен АКШда иштебейм. Мен - орусмун",- деди Сигал Чыгыш экономикалык форумунан кийин.

2022-жылдын август айында да Сигал орус телеканалына берген маегинде өзүн орус деп эсептей турганын билдирген. Ошондой эле ал "Адилеттүүлүк үчүн" деген даректүү тасмада да ушундай эле билдирүү жасаган. Ал тасмада Сигал 2022-жылы Орусия президенти Владимир Путинге кат жазып, анда "өзүнүн президенти үчүн өлүүгө даяр" экенин жана анын тарабында согушууга даярдыгын билдирген.

Сигал 2016-жылы Орусия жарандыгын алган, ал эми 2018-жылы Орусия ТИМинин АКШ менен гуманитардык байланыштар боюнча атайын өкүлү болуп дайындалган. 2023-жылы Путин аны "Достук" ордени менен сыйлаган.