Токмокто ымыркайды сүзүп кеткен мотоциклдин айдоочусу кармалды

Токмок шаарында 1 жаштагы ымыркайды сүзүп кеткен мотоциклдин айдоочусу кармалды. Бул тууралуу Чүй облустук ички иштер башкармалыгы билдирди.

Буга чейин Чүй облустук жол кыймылынын коопсуздугун камсыздоо башкармалыгы кечээ, 7-сентябра 23 жаштагы айдоочу бир үй-бүлө мүчөлөрүн сүзүп кеткенин маалымдаган.

Кырсыктын кесепетинен 21 жаштагы жубайлар ооруканага жаткырылса, алардын 1 жаштагы ымыркайы окуя болгон жерде чарчап калган.

Облустук милиция наристенин апасы шаардык оорукананын реанимация бөлүмүнө жеткирилгенин тактады. Факт боюнча Кылмыш-жаза кодексинин 312-беренесинин (Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу) негизинде кылмыш иши козголуп, шектүү убактылуу кармоо жайына киргизилген.

Учурда тергөө иштери уланууда.