Токаев Казакстандын парламентин бир палаталуу кылууну сунуштады

Казакстандын президенти Касым-Жомарт Токаев парламентти реформалоону жана аны бир палаталуу кылууну сунуштады. Бул тууралуу казак басылмалары жазышты.

Токаев 2022-жылы жарандардын көпчүлүгү парламенттин ролун кеңейтүүнү колдогонун белгилеп, бирок "бир жерде токтоп турууга болбой турганын" кошумчалады.

Ал өкмөт реформаны жылдын ичинде иштеп чыгып, 2027-жылы жалпы улуттук референдум өткөрүүгө даяр болорун айтты.

"Менин оюмча, реформанын өзгөчө мүнөзүн эске алуу менен талкуу жүргүзүүгө кеминде бир жыл кетет, андан кийин 2027-жылы жалпы улуттук референдум өткөрүп, Конституцияга керектүү өзгөртүүлөрдү киргизсе болот", — деди ал.

Казакстандын парламенти 1995-жылдан бери эки палаталуу болуп саналат. Анда Сенат жана Мажилис иштейт.

Сенат (жогорку палата) — депутаттары кыйыр жол менен маслихаттар (жергиликтүү башкаруу органдары) аркылуу шайланып, ошондой эле президент тарабынан дайындалат. Мажилис (төмөнкү палата) — депутаттары жалпы шайлоолор аркылуу шайланат жана мыйзамдарды кабыл алуунун негизги палатасы болуп эсептелет. Мажилистин 70 пайызы партиялык тизмелер боюнча, 30 пайызы бир мандаттуу округдардан шайланат.