Евробиримдик Казакстанга карата санкция киргизиши мүмкүн

Евробиримдик Казакстанга каршы санкцияларды алгач ирет колдонуу мүмкүнчүлүгүн караштырууда. Бул тууралуу Bloomberg агенттиги билдирди.

Маалыматка караганда, бул чара өлкөгө айрым жабдууларды импорттоого тыюу салууну камтышы мүмкүн. Евробиримдиктин соода боюнча маалыматына ылайык, бул жабдуулар ири көлөмдө Орусияга кайра жөнөтүлүп, ал жакта курал-жарак өндүрүүдө пайдаланылууда.

Bloomberg белгилегендей, мындай инструментти колдонуу үчүн олуттуу далилдер талап кылынат жана бардык санкциялар сыяктуу эле, бул чарага да мүчө мамлекеттердин колдоосу зарыл.

Мындан тышкары Евробиримдик жаңы санкциялардын пакетин даярдап жатат. Ал бир катар орусиялык банктарга, энергетикалык компанияларга, төлөм системаларына, кредиттик карталарга, криптовалюта биржаларына жана мунай соодасына кошумча чектөөлөрдү киргизүүнү камтышы мүмкүн.

Евробиримдиктин бул сунушталган санкциялык пакети жакынкы күндөрү талкууланмакчы.