Иранда кургакчылыктан жабыркаган Урмия көлү соолуп калды

Ирандын Батыш Азербайжан провинциясында жайгашкан дүйнөдөгү эң чоң туздуу көлдөрдүн бири болгон Урмия көлү толугу менен кургап калганы айтылды. Бул тууралуу ирандык басылмалар жазышты.

Иран медиасында жарыяланган спутниктик сүрөттөрдө көлдүн эч кандай изи көрүнбөйт. Ирандык аткаминерлер кургакчылыктан келип чыккан көйгөйдү чечүү мүмкүн болбосо, Урмия көлү жайдын аягына чейин толугу менен кургап калары тууралуу эскертишкен.

Кургакчылыктан улам 2003-жылы суунун деңгээли төмөндөй баштаган Урмия көлү 2013-жылы толугу менен кургап кетүү коркунучуна туш болгон. Тегеран башкаруусу көлдү мурунку калыбына келтирүү үчүн 6 миллиард долларлык бюджет менен өлкөнүн эң ири экологиялык долбоорун баштаса да, өлкөдө уланып жаткан кургакчылыктан улам каалаган натыйжага жетүүгө мүмкүн болгон жок. Өлкөдө көлдү кайра жандандыруу талабы менен мезгил-мезгили менен акциялар да өткөрүлүп турду.