Үрүмчү шаарында атайын күчтөрдүн алгачкы эл аралык мелдеши ачылды (фото)

8-сентябрдан 11-сентябрга чейин Үрүмчү шаарында Кытайдын Коомдук коопсуздук министрлигинин жана Борбор Азия мамлекеттеринин Ички иштер министрликтеринин атайын бөлүк кызматкерлери арасында кесиптик чеберчилик боюнча алгачкы мелдеш өтүүдө. Бул тууралуу Ички иштер министрлигинен билдиришти.

Катышуучулар арасында ички иштер министринин орун басары Октябрь Урмамбетов баштаган делегация бар.

Аталган мелдештер кесиптик чеберчиликти көрсөтүү, тажрыйба алмашуу жана аймактагы мамлекеттердин күч түзүмдөрүнүн ортосундагы практикалык кызматташтыкты өнүктүрүү үчүн уникалдуу аянтча болуп калды.

Ачылыш аземинде уюштуруучулар мындай иш-чараларды өткөрүү кызматкерлердин билим деңгээлин жогорулатууга гана жардам бербестен, мамлекеттер ортосундагы ишенимди жана өз ара түшүнүшүүнү бекемдөөгө да өбөлгө түзөрүн белгилешти.

Катышуучу командалар бир нече күндүн ичинде жогорку физикалык чыдамкайлыкты, кесиптик билимди жана командалык иштөө жөндөмүн талап кылган татаал тактикалык тапшырмаларды аткарууда өз күчүн сынашат.