Непалдын президенти өлкөдөгү баш аламандыкка байланыштуу отставкага кетти 

Непалдын президенти Рам Чандра Паудел өлкөдөгү баш аламандыктарга байланыштуу отставкага кетти. Бул тууралуу чет элдик басылмалар жазышты.

"Премьер-министрдин отставкасынан кийин… Паудел да кызматын тапшырды",- деп айтылат маалыматта.

Өткөн жуманын аягында Непал бийлиги бир катар социалдык тармактарга тыюу салган. Буга алардын белгиленген мөөнөттө байланыш жана маалыматтык технологиялар министрлигинде каттоодон өтпөгөнү себеп болгон. Бул чечим өлкөдө жаштардын массалык нааразылыгына алып келген.

Полиция менен болгон кагылыштарда 22 адам каза болуп, жүздөгөн жаран жаракат алган.

Кийинчерээк өкмөт соцтармактарга коюлган чектөөнү алып салганына карабастан, нааразычылыктар токтогон жок. Демонстранттар премьер-министр Шарма Олинин отставкасын талап кылышкан.

Бүгүн акциянын катышуучулары премьер-министрдин жеке резиденциясын, өкмөттүк комплекс менен парламент имаратын өрттөшкөн.

Премьер-министр кызматтан кеткен соң, өкмөт мүчөлөрүн резиденциядан тик учактар менен эвакуациялашкан.