Жапаров футбол боюнча Кыргызстандын курамасын колдоо үчүн стадионго келди (фото)

Президент Садыр Жапаров футбол боюнча Кыргызстандын жаштар курама командасын жеке колдоо үчүн Дөлөн Өмүрзаков атындагы стадионго келди.

Кыргызстандын курамасы Шри-Ланка менен ойноп жатат. Оюн футбол боюнча (U-23) Азия Кубогуна тандоонун алкагында өтүүдө.

Белгилей кетсек, финалдык этапка 16 мыкты команда чыгат: турнирдин кожоюну Сауд Арабиясы автоматтык түрдө катышат, ошондой эле ар бир тайпанын жеңүүчүлөрү – 11 команда жана эң мыкты көрсөткүчкө ээ болгон экинчи орундагы төрт команда финалдык баскычка жолдомо алышат.

Азия Кубогунун финалдык этабы 2026-жылдын январь айында Сауд Арабиясында өтөт.