Бишкекте 8 айда иш менен камсыз кылуу бөлүмдөрү аркылуу 4 миңден ашык жаран ишке орношту

Бишкекте 8 айда иш менен камсыз кылуу бөлүмдөрү аркылуу 4 миңден ашык жаран ишке орношту. Бул тууралуу бүгүн, 10-сентябрда Эмгек министрлигинин маалымат кызматы билдирди.

Бишкек шаарынын калкты иш менен камсыз кылууга көмөктөшүү башкармалыгынын маалыматына ылайык, январь-август айларында ишканалар жана уюмдар тарабынан 9 040 бош орун берилген, алардын ичинен 6 442си жумушчу орундар. 1-сентябрга карата бош орундар базасында 4 263 орун калган, анын ичинен 2 924ү жумушчу орундар болуп эсептелет.

Эмгек рыногунда эң көп талап кылынган кесиптер: мугалим, дарыгер, айдоочу, тигүүчү, сатуучу, курьер, официант.

Сегиз айдын ичинде жумуш издеп иш менен камсыз кылууга көмөктөшүү бөлүмдөрүнө кайрылгандардын саны 11 251 адамды түздү. Алардын ичинен 3 927си жумуш издөөчү катары каттоого алынып, 7 324 жаранга эмгек мыйзамдары, кесиптик окуу жана кайра даярдоо, кесип тандоо жана жумуш ордун алмаштыруу боюнча консультациялар берилген.

Кызмат көрсөтүүлөрдүн жардамы менен 2 915 жумушсуз жаран ишке орноштурулса, окуусун аяктагандан кийин дагы 1 129 адам жумушка орношту.

Кызматтардын ишиндеги артыкчылыктуу багыттардын бири – жумушсуз жарандарды ишке орноштурууга көмөктөшүү болуп саналат. Атап айтканда:

• кесиптик окутуу жана кайра даярдоо (1 433 адам окутууга жөнөтүлгөн);
• акы төлөнүүчү коомдук иштер (825 адам тартылган);
• социалдык контракттын негизинде ишкердик ишмердүүлүк;
• жаштар стажировкасы.

Ошондой эле отчёттук мезгил ичинде Бишкек шаарынын 57 мектебинин 9-классын аяктаган 5 011 бүтүрүүчү кесиптик тестирлөөдөн өттү.

Май айынан тартып Бишкек шаардык калкты иш менен камсыз кылууга көмөктөшүү башкармалыгына өткөрүлгөн 1221 колл-борбору иш менен камсыз кылуу маселелери боюнча 263 чалууну кабыл алды.