Францияда нааразылык акцияларында 200гө жакын адам кармалды

Францияда президент Эммануэль Макрондун саясатына каршы өтүп жаткан акцияларда 200гө жакын адам кармалды. Бул тууралуу чет элдик басылмалар жазышты.

Маалым болгондой, "Баарын токтотолу" деген ураан менен уюштурулган нааразылык өлкө боюнча уланып жатат. Парижде жүздөгөн митингчилер Түндүк вокзал аймагына топтолуп, полиция көздөн жаш чыгаруучу газ жана таяк колдонуп таркатты.

Митингчилер өкмөттүн үнөмдөө саясатына жана премьер-министр болуп Себастьян Лекорнюнун дайындалышына каршы чыгышууда.

Марселде да миңдеген адам "Макрон, отставкага кет" деген ураан менен көчөгө чыкты. Аймактарда дыйкандар жол тосуу акцияларын, ал эми кээ бир шаарларда окуучулар мектеп кире беришинде акцияларды өткөрүштү.

Ички иштер министри Бруно Ретайо учурда 200гө жакын адам кармалганын билдирди.