Бишкек ЖЭБинде 300 метрлик түтүктү сырдоо иштери уланууда

"Бишкек ЖЭБ" муниципалдык ишканасы күз-кыш мезгилине даярдык көрүү максатында станциянын объектилерин жаңылоо жана тейлөө боюнча пландык иштерди улантууда. Бул тууралуу Бишкек шаарынын мэриясынан билдиришти.

Маалым болгондой, негизги этаптардын бири ишкананын 300 метр бийиктиктеги эң бийик түтүгүн сырдоо болгон.

Ишти адистештирилген подряддык уюм алып барып, өндүрүштүк альпинист-ширетүүчү жана альпинист-электриктер, жогорку температурага жана атмосфералык таасирлерге туруктуу заманбап боёкторду жана лактарды колдонуу менен ишке ашырган.

"Жаңыланган жабдуу конструкциянын кызмат мөөнөтүн узартат, аны коррозиядан жана жагымсыз аба ырайынан коргоону камсыз кылат, ошондой эле объектке тыкан жана заманбап көрүнүш берет. Бүгүнкү күндө иш 80 пайызга аткарылды", - деп айтылат маалыматта.