Германияда Израилге курал-жарак жеткирүүнү толугу менен токтотуу сунушталды

Германиялык саясатчы Сара Вагенкнехт Германия өкмөтүн Израил армиясынын Катарга жасаган аба соккусун айыптоого жана Тель-Авивге курал-жарак жеткирүүгө толук тыюу салууга чакырды. Бул тууралуу ал социалдык тармактагы баракчасына жазды.

"Бул аскердик соккудан кийин Германия өкмөтү курал-жарак жеткирүүнү токтотушу керек", — деди Вагенкнехт.

Ошондой эле ал Германия Палестинаны эгемендүү мамлекет катары таанышы зарыл экенин белгиледи.

Эске салсак, 9-сентябрда Израил Катардагы Доха шаарына ракета менен сокку урган. Расмий маалыматтарга ылайык, чабуул учурунда ХАМАС кыймылынын саясий кеңешинин мүчөлөрү жашаган турак жайлар жабыркаган.

Ал эми Израилдин премьер-министри Биньямин Нетаньяхунун кеңсеси өлкө ХАМАС жетекчилерине каршы операция жүргүзгөнүн жана ага жоопкер экенин ырастап, бирок Катарды ачык атаган эмес. Ошондой эле Катардын премьер-министри Мухаммед бен Абдель Рахман бен Жасим Аль Тани Доха Израилге жооп кайтарууга укуктуу экенин жана өзүнүн эгемендүүлүгүн бузууга жол бербей турганын билдирди.