АКШда Трамптын тарапташы Чарли Киркти атып кетишти (видео)

АКШнын Юта штатындагы университеттердин биринде коомдук ишмер жана Дональд Трамптын тарапташы Чарли Киркке кол салуу болду. Ал сөз сүйлөп жаткан учурунда белгисиз адам тарабынан атылганын чет элдик басылмалар жазышууда.

Алгачкы маалыматтар боюнча, ок 200 метр алыстыктан атылып, Кирктин моюнуна тийген. Ал оор абалда ооруканага жеткирилди. Кийинчерээк АКШнын президенти Дональд Трамп Кирктин каза болгонун ырастады. Анын 31 жашта экени маалым болду.

Чарли Кирк жаштар арасында консервативдик баалуулуктарды жайылткан "Turning Point USA" аттуу кыймылдын негиздөөчүсү болгон. Ал ошондой эле подкасттарга жана саясий дебаттарга активдүү катышып турган.

Окуя болгон учурда университетте дүрбөлөң түшүп, студенттер жан үрөп качышкан. Социалдык тармактарда окуядан тартылган видеолор тараган.

Башында полиция шектүүнү кармаганын билдирген, бирок чыныгы аткан жаран азырынча кармала электиги кийинчерээк маалым болду.