Катар Израилдин соккусунан кийин АКШ менен өнөктөштүгү тууралуу айтылган маалыматты четке какты

Катар бийлиги Израилдин Дохадагы соккусунан кийин АКШ менен коопсуздук чөйрөсүндөгү кызматташтыкты кайра караштыруусу тууралуу интернетте тараган маалыматтарды четке какты. Бул тууралуу Катардагы Эл аралык маалымат кеңсеси билдирүү таратты.

"Axios порталынын маалыматына ылайык, Доха АКШ менен коопсуздук жаатындагы кызматташтыгын кайра карап жатат деп айткан маалымат негизсиз жана Катар менен АКШнын тыгыз мамилесине зыян келтирүүгө умтулган аракет", — деп айтылат расмий билдирүүдө.

Маалыматта эки өлкөнүн коргонуу жана коопсуздук жаатындагы байланышы "эч качан мынчалык бекем болгон эмес" деп белгиленип, ал мындан ары да бекемделе турганы айтылат.

Эске салсак, 9-сентябрда Израил Дохадагы ХАМАС уюмунун жетекчилигинин штабына сокку урган. Катар бийлиги бул окуяны «коркунучтуу кол салуу» деп атаган. Араб лидерлери Катарга колдоо көрсөткөн. АКШ президенти Дональд Трамп Дохадагы операциянын АКШнын да, Израилдин да кызыкчылыгына жооп бербестигин белгилеген.