Швеция Украинага 7,5 миллиард долларлык аскердик жардам жөнөтөт

Швециянын коргоо министри Пол Йонсон билдиргендей, аталган өлкө алдыдагы эки жыл ичинде Украинаны колдоо үчүн 7,5 миллиард доллар бөлөт. Бул тууралуу чет элдик басылмалар жазышты.

Бул каражаттын негизги бөлүгү Швециянын курал-жарак башкармалыгы аркылуу өзү жүрүүчү артиллериялык жабдуулар Archer жана башка куралдарды сатып алууга жумшалып, кийин Украинага өткөрүлүп берилет.

Мындан тышкары Йонсон Швеция Польшага да аскердик жардам көрсөтүүгө даяр экенин белгиледи.

"Биз Польшанын Коргоо министрлиги менен байланышып, эгерде Польшага зарыл болсо, ресурстарды берүүгө даяр экенибизди билдирдик", — деди ал.

Эске салсак, 10-сентябрга караган түнү орус дрондору Польшанын аймагына киргени кабарланган. Орусиянын Коргоо министрлиги орус аскерлери Украинанын аскердик өнөр жай объектилерин аткылаганын билдирип, дрондордун максималдуу учуу аралыгы 700 чакырымдан ашпасын белгилеген. Польшага союздаш көптөгөн мамлекеттер жардам берүүгө даярдыгын билдиришти.