Жалал-Абадда унааларга керектүү химиялык каражаттарды мыйзамсыз өндүргөн цех табылды

Жалал-Абад шаарында автоунаалар үчүн химиялык каражаттарды өндүрүп келген мыйзамсыз цех аныкталды. Бул тууралуу Мамлекеттик салык кызматы билдирди.

Маалыматка ылайык, мыйзамсыз цех салыкчылар менен милиция кызматкерлеринин биргелешкен рейддик көзөмөл учурунда аныкталган. Цех калк жыш жайгашкан "Спутник-22" турак жай конушунда жайгашкан. Бул өз кезегинде калктын ден соолугуна олуттуу коркунуч туудурган. Ошондой эле өрт чыгуу же жарылуу коркунучу жогору болгон жана өндүрүштүк иш-аракеттерге ылайыкташтырылган эмес.

Цехтин имаратынан болжол менен 45 тонна техникалык спирт болуп саналган түссүз суюктук табылган. Андан сырткары, көп сандагы этикеткалар, капкактар, таралар жана сатууга даярдалып жаткан продукциялар, анын ичинде антифриз, айнек жуугуч суюктук жана башка техникалык каражаттар алынган. Ишкананын химиялык өндүрүмдөрдү өндүрүүгө уруксат кагазы болгон эмес.

Өндүрүлгөн продукция мотор майын алмаштыруу түйүндөрү жана белгилүү бренддердин атын жамынып, унаа тетиктерин сатуучу жайларда сатыкка коюлуп турган.

Салык кызматы факт боюнча материалдар соттук экспертизаны жана укуктук баа берүүнү жүргүзүү үчүн укук коргоо органдарына өткөрүлүп берилерин кошумчалады.