Жогорку Кеңеште өзүн-өзү таркатуу боюнча демилгечи топ түзүлгөнү айтылууда

Жогорку Кеңеште өзүн-өзү таркатуу боюнча демилгечи топ түзүлгөнү айтылууда. Учурда депутаттардан кол топтоо жүрүп жатканын жергиликтүү маалымат каражаттары өздүк булактарына таянуу менен жазышууда.

Сунуш кийинки аптада тиешелүү комитетте каралышы мүмкүн экени айтылды. Ал эми Жогорку Кеңештин маалымат кызматы андай маселе көтөрүлбөгөнүн билдирди.

Буга чейин депутат Исхак Масалиев парламент тарай турганын кыйыткан билдирүү жасаган. Анын билдирүүсүнөн кийин күзүндө мөөнөтүнөн мурда парламенттик шайлоо өтөрү жөнүндө сөздөр күчөдү.

Коомчулукта парламент тарашы мүмкүн делген кептер февраль айында Жогорку Кеңештин депутаттарын шайлоо тартибин өзгөртүүнү сунуштаган мыйзам долбоору коомдук талкууга коюлганда айтыла баштаган. Кийинчерээк, март айында аталган мыйзамдын демилгечилеринин бири, депутат Нурбек Сыдыгалиев Жогорку Кеңеш тууралуу айтылган кептерди четке каккан.