Японияда 206 депутат өкмөттөн Палестина мамлекетин таанууну суранды

Япониянын 206 депутаты өкмөттөн Палестина мамлекетин таануу өтүнүчү менен кол коюлган катты тышкы иштер министри Ивaя Такешиге тапшырды. Бул тууралуу чет өлкөлүк басылмалар жазышты.

Маалым болгондой, бул топко оппозициядагы Конституциялык Демократиялык Партиядан жана өкмөттөгү Либералдык Демократиялык Партиядан мүчөлөр кирген. Депутат Абе Томоко Израилдин ок атышууну токтотууга макул эместигин жана балдардын ачка калышын четке кагууга болбой турганын белгиледи.

Министр Ивaя катка көптөгөн депутаттар кол койгону үчүн маселени олуттуу карай турганын айтты. Япония парламентинде учурда 713 депутат иштейт.

Эскерте кетсек, Франция, Улуу Британия, Канада жана Австралия өлкөлөрү бул айдагы БУУ Башкы ассамблеясынын сессиясында Палестина мамлекетин таануу планын жарыялашкан.