Непалда парламенттин имараты толугу менен талкаланды

Непалдын борбору Катмандудагы парламенттин имараты нааразылык учурунда өрттөлүп, толугу менен талкаланды. Бирок комплекстин аймагында аскерлер патрулдук кызматын улантууда. Бул тууралуу чет элдик басылмалар жазышты.

Видеодо жарым-жартылай талкаланган парламенттин имаратын көрүүгө болот. Өрттөнгөн дубалдарда нааразылык акциясынын катышуучулары өз кыймылынын атын (Z мууну) жана "Туура эмес адамдар менен согуштуңуз!" деген жазууларды калтырышкан.

Учурда Непалда жаштардын кеңири катышуусунда нааразычылык акциялары өтүүдө. Буга өкмөттүн YouTube, X (Twitter), Facebook, Instagram, WhatsApp сыяктуу жыйырмага жакын популярдуу социалдык тармактарга жана мессенжерлерге бөгөт койгон чечими себеп болгон.

Бирок бийлик бул чечимди жокко чыгаргандан кийин да митингдер токтогон жок. Демонстранттар санарип эркиндиктерден тышкары коррупцияга каршы күрөшүү, терең системалык реформаларды жүргүзүү жана өкмөттүн толук ачыктыгын камсыз кылууну талап кылышууда.

Акыркы маалыматтар боюнча, кагылышуулардан 50дөн ашык адам курман болуп, болжол менен 1000дей адам жаракат алды.

9-сентябрда Khabarhub маалымдагандай, нааразычылык акциялары маалында митингчилер экс-премьер Шера Деубуга жана анын жубайына жана каржы министри Прасад Пауделге кол салышкан. Ошондой эле мамлекеттик мекемелер, анын ичинде парламент менен Жогорку Соттун имараттары, бийликтин айрым өкүлдөрүнүн резиденциялары чабуулга кабылып, айрымдары өрттөлгөн. Окуяга байланыштуу өкмөт башчысы, өлкө президенти отставкага кеткен.