Шотландиядагы университетте жаныбарлар үчүн "акылдуу интернет" түзүлүүдө

Глазго университетинин окумуштуулары жакынкы жылдары иттер менен мышыктар өз ээлерине телефон аркылуу чалуусу үчүн жаңы долбоор үстүндө иштеп жатышат. Алар жаныбарлар менен байланыштын революциялык системасын түзүүнү көздөп, чыныгы "жаныбарлар үчүн интернетти" иштеп чыгышууда.

Изилдөөчүлөрдүн тобу бул багытта 4 жылдан бери иштеп келет. Учурда DogPhone аттуу атайын аппарат сыноодон өтүүдө. Анда ит оюнчукту кармаса, видеобайланыш автоматтык түрдө ишке кирет. Ошондой эле тоту куштар үчүн атайын сенсордук экрандар иштелип чыгууда, алардын жардамы менен тоту куш ээси менен баарлаша алат.

Жаңылыктар зоопарктар үчүн да колдонулат. Мисалы, маймылдар өздөрү эле үндөрдү, жыттарды же видеону кошо алышат.

Бул долбоорду өнүктүрүү үчүн 1,5 миллион евролук грант берилген. Сыноолор ийгиликтүү аяктагандан кийин жаныбарлар үчүн интернет дүйнөнүн көптөгөн жерлеринде колдонулары күтүлүүдө.