"Интервидение-2025" музыкалык конкурсунда Кыргызстан экинчи болуп чыгат 

Москва шаарында өткөн чүчү кулактын жыйынтыгында кыргыз триосу Nomad эл аралык «Интервидение-2025» музыкалык конкурсуна экинчи номер менен чыгуу укугун алды. Бул тууралуу Маданият, маалымат жана жаштар саясаты министрлигинен билдиришти.

Трио конкурста «Жалгыз сага» чыгармасын аткарып, кыргыз улуттук мотивдери менен заманбап аранжировканы айкалыштырат. Бул аткаруу топтун башкы сыйлык үчүн күрөшүндөгү алгачкы чоң кадамы болот.

Музыкалык сынак 20-сентябрда Москвадагы Live Arena сахнасында өтөт. Башкы сыйлык болуп Кристалл кубогу жана 30 миллион рубль эсептелет. Ыр сынагынын жеңүүчүсүн эл аралык калыстар тобу аныктайт, алардын катарында Кыргызстандын атынан ырчы Ырыскелди Осмонкулов бар.