Дүйнө чемпиондугу: Эрназар Акматалиев коло медаль үчүн күрөшөт (видео)

Кыргызстандык балбан Эрназар Акматалиев Хорватияда өтүп жаткан күрөш боюнча дүйнө чемпиондугунда коло медаль үчүн күрөшөт.

Ал 70 килограмм салмак ченинде күч сынашууда.

Кечээ, 13-сентябрда биринчи кармашта кыргызстандык балбан Чилиден келген атаандашын мөөнөтүнөн мурда 10:0 эсебинде жеңди. Бирок кийинки айлампада жапон балбаны Йосиносукэ Аоягиге 0:11 эсебинде утулуп калды.

Жапониялык балбан финалга чыккандыктан, Акматалиевге коло үчүн күрөшүүгө мүмкүнчүлүк берилди.

Бүгүн, 14-сентябрда көңүл жубатуучу таймаштын биринчи раундунда Акматалиев венгриялык Исмаил Мусукаев менен беттешти. Эске салсак, Париж Олимпиадасында Акматалиев ага утулуп калган болчу. Бул ирет аны 14:4 эсебинде утуп, мөөнөтүнөн мурда жеңишке жетти.

Эми финалдык бөлүктө Акматалиев армениялык Арман Андреасян менен коло медаль үчүн килемге чыгат. Беттештер бүгүн Бишкек убактысы боюнча саат 22:00дө башталат.