Зеленский Орусиядагы мунай ишканаларына жасалган соккулар жөнүндө айтты

Украина президенти Владимир Зеленский 14-сентябрдагы кечки видео кайрылуусунда украин аскерлеринин Орусиянын мунай тармагына жасаган ийгиликтүү соккулары тууралуу айтты.

"Бүгүн өзгөчө биздин бардык жоокерлерге ыраазычылык билдиргим келет. Алар Орусияга чындап эле олуттуу жоготууларды алып келүүдө – фронтто да, чек арада да, алыскы соккуларыбыз аркылуу Орусиянын өз аймагында да. Эң эффективдүү санкциялар – тез иштеген санкциялар. Бул – Орусиянын мунай заводдорундагы, терминалдарындагы, мунай базаларындагы өрттөр. Биз Орусиянын мунай тармагын олуттуу чектедик, бул согушту да олуттуу чектейт. Орусиянын согушу – негизинен мунайдын, газдын жана башка энергия ресурстарынын функциясы",- деди ал.

Украин лидери жакында Балтика деңизиндеги Приморск шаарында Орусиянын эң ири мунай терминалына сокку урган жоокерлерге ыраазычылык билдирди.

"Олуттуу зыян келтирилди, баары текшерилди. Бул душман үчүн даана сезилет. Биздин атайын күчтөр Усть-Луга портуна жана Орусиянын дүйнөлүк рынокко чыгуудагы бардык башка пункттарына да көз салып турушат",- деп жазды Зеленский.

Буга чейин украин аскерлери Ленинград облусундагы Орусиянын ири Кириш мунай иштетүүчү заводун атканы, ошондой эле 13–14-сентябрда украин атайын кызматтары Орусиядагы эки темир жол линиясында кыймылды токтотуу операциясын жүргүзгөнү кабарланган.