Министр мамлекеттик ооруканаларга каржылык автономия берүү керектигин айтты

Саламаттык сактоо министри Эркин Чечейбаев Жогорку Кеңештин Социалдык саясат боюнча комитетинин жыйынында мамлекеттик ооруканаларга каржылык автономия берүү керектигин билдирди.

Айтымында мындай демилге жакынкы жылдары ишке ашышы мүмкүн.

"Жаңы демилгелерди көтөрүп жатабыз. Бул - мамлекеттик ооруканаларга каржылык автоноимияны берүү.

Биз азыр социалисттик эмес, социалдык мамлекетпиз. Бул деген - пенсионерлерге, балдарга, майыптыгы бар жарандарга кам көрүү дегенди түшүндүрөт. Ал эми ишке жөндөмдүү жарандар, мамлекеттик кепилдик программасынан сырткары кошумча кызматтарга акы төлөшү керек,- дейт министр.

Ал арада депутат Элдар Абакиров медициналык кепилдик программасынан бюджетке канча каражат түшөрүнө жана канчасы сарпталарына кызыкты.

Милдеттүү медициналык камсыздандыруу фондунун төрагасынын орун басары Санжарбек Исаевдин айтымында, камсыздандыруу боюнча элден 8 миллиард сомдой каражат чогулат.

Ал эми министр Чечейбаев бюджеттен медицина тармагына 45 миллиард сом бөлүнөрүн кошумчалады.

Каржылык автономия – мында мекеме финансылык башкарууну өзү көзөмөлдөй алат. Тактап айтканда, өз каражаттарынын эсебинен өз активдерин каржылоо мүмкүнчүлүгүнө ээ болот.