Испаниянын премьер-министри: "Израил да спорттук мелдештерден четтетилиши керек"

Испаниянын премьер-министри Педро Санчес Газада адамзатка каршы кылмыш жасаган Израил да, Орусия сыяктуу, эл аралык спорттук мелдештерден четтетилиши керек деп билдирди.

Бул билдирүүнү Санчес Испаниянын белгилүү веложарышы La Vuelta‘нын 14-сентябрдагы финалдык этабында Израилге каршы тынчтык митингдеринен улам жарыш токтотулгандан кийин жасады. Ал митингдерде кээ бир күч колдонуу учурларын сындап, бирок тынч демонстрацияларды уюштурган испандыктарга сыймыктанганын айтты.

"Орусия Украинага кол салгандан кийин спорттук мелдештерден четтетилди, бирок Израил Газаны басып алгандан кийин эмне үчүн четтетилген жок", - деди ал.

Премьер-министр спорттук уюмдарды Израилдин эл аралык мелдештерге катышуусу этикалык жактан туурабы деген маселени карап чыгууга чакырды.