Голливуд жылдызы Роберт Редфорд 89 жашында дүйнөдөн кайтты

АКШда 89 жашында Голливуддун белгилүү актёру, режиссёру, көз карандысыз киного дем берүүчү жана "Сандэнс" кинофестивалынын негиздөөчүсү Роберт Редфорд көз жумду. Ал Юта штатындагы сүйүктүү Сандэнс тоолорунун жанындагы үйүндө жакындарынын курчоосунда каза болгону кабарланды. Бул тууралуу анын коомчулук менен байланыш боюнча өкүлү Синди Бергер билдирди.

Өлүмүнүн себеби айтылган жок. Редфорд 1960-жылдары жылдыз болуп, 1980-жылы "Кадимки адамдар" тасмасы үчүн "Оскар" сыйлыгын алган. Ал "Бутч Кэссиди жана Сандэнс Кид" (1969) жана "Афера" (1973) фильмдери аркылуу даңкка жетип, бул эки тасма классикага айланган.

1970-жылдары ал тапкан акчасын "Сандэнс" институту менен фестивалын түзүүгө жумшап, көз карандысыз кинематографиянын өнүгүшүнө чоң салым кошкон.