Кыргызстандык сумочулар Азия жана Дүйнө чемпиондугунда 11 медалга ээ болушту (фото)

13-14-сентябрда Таиланддын борбору Бангкок шаарында сумо күрөшү боюнча Азия жана Дүйнө чемпиондугу өттү. Сумо күрөшү боюнча Кыргызстандын улуттук курама командасы аталган иш-чарадан 11 медаль жеңди. Бул тууралуу бүгүн, 17-сентябрда Дене тарбия жана спорт мамлекеттик агенттигинен билдиришти.

Азия чемпиондугунда кыргыз сумочулары жекеме-жеке жана командалык таймаштарда төмөндөгүдөй жыйынтык көрсөтүштү:

Жекелик оюндарда Надыр Рассуев (115 килограммдан жогору) жана Айкөл Зияпова (80 килограммдан жогору) күмүш медаль;
Феликс Эмирлан уулу (85 килограммга чейин), Аян Сейитбеков (100 килограммга чейин), Даниел Темирбеков (115 килограммга чейин) коло медаль.

Командалык оюндарда эркектер арасында Константин Абдула-Заде, Георгий Абдула-Заде жана Сулде Донгак күмүш медалга ээ болду. Кыргызстандын командасы япон спортчуларына гана утулду.

Аялдар арасында Даткайым Уланбек кызы, Айкөл Зияпова жана Сезимай Калмырзаева коло байгени жеңди. Бул Кыргызстандын аялдар курама командасынын тарыхындагы биринчи командалык медаль.

Ал эми дүйнө чемпиондугунда Кыргызстандын курама командасы төмөнкүдөй жыйынтыктарга жетишти:

Георгий Абдула-Заде (85 килограммга чейин) жана Сезимай Калмырзаева (18 жашка чейинки юниорлор арасындагы абсолюттук категория) күмүш медалга ээ болду. Константин Абдула-Заде (100 килограммга чейин) жана Сулде Донгак (115 килограммга чейин) коло медаль тагынды.

Аян Сейитбеков жана Айкөл Зияпова дагы татыктуу натыйжаларды көрсөтүп, 20дан ашык өлкөнүн спортчуларынын арасында 5-орунду ээледи.