Ооганстандын  алты провинциясында интернетке чектөө киргизилди

Ооганстандын алты провинциясында интернетке чектөө киргизилди. Маалыматка караганда, өлкөнүн Балх, Кандагар, Гильменд, Герат, Урузган жана Нимроз провинцияларында мамлекеттик компания Afghan Telecom тармагындагы оптикалык булактык интернет өчүрүлдү. Бул тууралуу Amu.tv кабарлады.

Герат провинциясында оптикалык булактык тармакты кеңейтүү иштери болжол менен эки апта мурун токтотулган. Азыркы учурда тармак мамлекеттик мекемелерде жана турак жайларда иштеп жатат, бирок талибдер жакын арада өчүрүлүшү мүмкүн экенин эскертишти.

Балх провинциясынын губернаторунун маалымат катчысы билдиргендей, бул чектөө Талибандын лидери Хайбатулла Ахундзаданын буйругу менен "моралдуу эмес иштердин алдын алуу" максатында киргизилди. Учурда бийлик расмий колдонуу үчүн альтернативдүү ички тармак түзүүнү караштырып жатат.

Талибдер оптикалык булактык интернетке гана чектөө коюлганын айтышса да, Мазари-Шариф шаарында жашагандар Afghan Telecom жана башка кабелдик интернет провайдерлеринин толугу менен өчүрүлгөнүн билдиришүүдө. Азыркы учурда мобилдик интернет гана жеткиликтүү.

Amu.tv булактарынын айтымында, бул абал онлайн кызматтарга, банк операцияларына, алыстан билим берүүгө жана ишкердикке терс таасирин тийгизүүдө.

Ооганстан беш коңшу мамлекет менен оптикалык булактык байланыш аркылуу туташкан. Мурдагы өкмөт бул тармакты өнүктүрүүгө дээрлик 150 миллион доллар инвестиция салган.