Жасалма интеллект келечектеги оору коркунучтарын алдын ала айта алат

Европа Молекулярдык биология лабораториясы, Германиянын Ракты изилдөө борбору жана Копенгаген университетинин окумуштуулары жаңы "Delphi-2M" аттуу жасалма интеллект моделин иштеп чыгышып, адамдардын кийинки 10 жыл ичинде жуктуруп калышы мүмкүн болгон ооруларды болжолдой алышарын изилдешти. Изилдөө натыйжалары Nature журналына жарыяланды.

Маалым болгондой, модель медициналык маалыматтарды колдонуп, ооруларды аба ырайын болжолдоого окшош ыкма менен алдын ала айтып бере алат.

Жасалма интеллект 400 миңден ашык британдыктын медициналык жазуулары боюнча үйрөтүлүп, дагы башка катышуучулардын жана Даниядагы 1,9 миллион адамдын маалыматтары менен текшерилген. Изилдөөгө катышкан окумуштуулар, моделдин өзгөчө 2-баскычтагы кант диабети, жүрөк ооруларын жана сепсис сыяктуу ооруларды так болжолдой аларын белгилешкен.

Модель азыр клиникалык колдонууга даяр эмес, бирок жогорку тобокелдиктеги бейтаптарды аныктоодо жана алдын ала дарылоого жардам бериши мүмкүн. Келечекте бул технология медициналык мекемелерге ооруларды пландоого да көмөк көрсөтөт. Модель мындан ары генетика, кан анализи жана сүрөттөп текшерүү сыяктуу кошумча медициналык маалыматтарды камтышы үчүн жаңыртылып жатат.