Макрон жубайы Брижиттин аял экенин далилдөө үчүн сотко далилдерди сунуштайт

Франциянын президенти Эммануэль Макрон жана анын жубайы Брижит Макрон АКШдагы сотко Брижиттин аял экенин тастыктаган сүрөттөрдү жана илимий далилдерди берүүнү пландап жатышат. Бул тууралуу Макрондордун адвокаты Том Клэр билдиргенин чет элдик басылмалар жазышты.

Соттук териштирүү АКШнын оңчул активисти Кэндис Оуэнске каршы козголгон. Ал социалдык тармактарда: "Брижит Макрон чындыгында эркек болуп төрөлгөн, анын чыныгы аты Жан-Мишель Тронье болгон", - деп билдирүү жасаган.

Адвокат Том Клэрдин айтымында, бул билдирүүлөр Брижит Макрон үчүн өтө оор болгон.

"Сотко илимий негиздеги эксперттик корутундулар жана далилдер берилет. Алардын арасында Брижиттин боюнда бар кезиндеги сүрөттөр жана балдары менен тартылган сүрөттөр да бар. Бул сүрөттөр бар жана алар сотко көрсөтүлөт", — деди Клэр.

23-июлда Financial Times басылмасы Макрон жана анын жубайы Кэндис Оуэнске каршы Делавэр штатындагы сотко 218 беттен турган доо арыз бергенин билдирген.

Бул арызда Оуэнс "чындыкка дал келбеген, ушак-айың жана каралоо мүнөзүндөгү" билдирүүлөрдү тараткан деп айыпталат. Алардын ичинен негизгиси — Брижит Макрон эркек болуп төрөлгөнү тууралуу жоромол.