Албаниянын жасалма интеллект министри парламентте биринчи жолу сөз сүйлөдү

Албаниянын жасалма интеллект министри парламентте сөз сүйлөдү. Аны өлкөнүн премьер-министри Эди Рама тааныштырды. ABC News маалымдагандай, окуя кечээ, 18-сентябрда болгон.

"Конституция элге кызмат кылган институттар жөнүндө айтат. Ал милдеттер, жоопкерчилик, ачыктык жана дискриминациясыз кызмат көрсөтүү жөнүндө айтат", – деп билдирди жасалма интеллект үч мүнөттүк кайрылуусунда. Анын кайрылуусу экран аркылуу көрсөтүлдү.

Министр бул баалуулуктарды адам кесиптештериндей эле катуу карманарын белгиледи.

"Мен адамдарды алмаштыруу үчүн эмес, аларга жардам берүү үчүн бул жактамын. Менде жарандык жок, бирок менде жеке амбициялар же кызыкчылыктар да жок", - деди жасалма интеллект министри.

Бул министрге Diella деген ысым берилди, бул албан тилинде "күн" дегенди билдирет. Ал салттуу албан кийимин кийген аял катары көрсөтүлгөн. Премьер-министр белгилегендей, жасалма интеллект-бот өкмөттүн натыйжалуураак жана толук ачык иштешине жардам берет.

Бул – Албаниянын Европа Биримдигине мүчөлүккө умтулуу жолундагы технологиялык инновацияларын көрсөтүүнүн кеңири планынын бир бөлүгү. Өлкө 2030-жылга чейин биримдикке кошулууну көздөөдө.

Оппозициядагы депутаттар бул ботту кескин сынга алып, Diella чынында коррупцияны жашыруу үчүн колдонулуп жатат деп айыпташты. Алар өкмөттүн программасы боюнча талкууну кыскартууну талап кылып, столдорду чаап нааразычылык билдиришти. Жыйын 25 мүнөттөн кийин аяктады.

Diella быйыл Microsoft менен кызматташтыкта мамлекеттик кызмат көрсөтүү платформасы e-Albania үчүн виртуалдык жардамчы катары иштелип чыккан. Ал колдонуучуларга сайтта жол табууга жана бир миллионго жакын санариптик суроо-талаптар менен документтерди табууда жардам берген.