Сокулукта жерлерди мыйзамсыз менчиктештирүүгө шектелип эки адам кармалды

Чүйдүн Сокулук районундагы жер мафиясынын ишмердүүлүгүнө бөгөт коюлду. Бул тууралуу Улуттук коопсуздук мамлекеттик комитети билдирди.

Маалыматка ылайык, Жер ресурстары, кадастр, геодезия жана картография боюнча мамлекеттик агенттиктин (мурдагы Кадастр мамлекеттик мекемеси) Сокулук районундагы бөлүмүнүн кызматкери жана "жер мафиясы" деп аталган уюмдун өкүлү ич ара кылмыштуу бүтүмгө келишип, жер тилкелеринин мурунку ээлеринин атынан менчик укугун берүүчү документтерди мыйзамсыз жасап, башка адамдардын атына каттоодон өткөрүшкөн.

Жасалма документтердин негизинде жер мафиясынын өкүлдөрү Сокулуктун Новопавловка айыл өкмөтүнүн (учурда Бишкек шаарынын курамында) аймагындагы жалпы аянты 15 гектар болгон айыл чарба багытындагы жер тилкелерин жеке менчикке өткөрүп беришкен.

Кармалган шектүүлөр тергөө абагына киргизилди. Учурда "жер мафиясы" деп аталган коррупциялык схемаларга тиешеси бар кызмат адамдарын аныктоо иштери уланууда.