Бишкекте автобуста кош бойлуу келинди сабаган аял кармалды

Бишкекте 212-автобустун жүргүнчүсүн сабаган келин кармалды. Бул тууралуу Ленин РИИБинин басма сөз кызматы билдирди.

Маалым болгондой, 19-сентябрда милицияга автобуста бара жаткан 30 жаштагы келин ур-тепкиге алынып, ооруканага жеткирилгени маалымдалды. Милицияга жабырлануучунун агасы арыз менен кайрылган.

Мындан тышкары, окуя болгон учурдун видеосу социалдык тармактарда тарады. Анда сабалып жаткан келин кош бойлуу экендигин айтып жатканын байкоого болот.

Бул факт боюнча Кылмыш-жаза кодексинин 280-беренеси (Бейбаштык) боюнча кылмыш иши козголуп, тиешелүү экспертизалар дайындалды.

Натыйжада 2005-жылы туулган М.С. аттуу жаран аныкталып, тергөө кызматына жеткирилди. Анын жаш баласы бар жана кош бойлуу экендиги аныкталды.

Учурда тергөө иштери уланууда. Алардын жыйынтыгы боюнча процессуалдык чечим кабыл алынат.