Кытайда Чикунгунья безгегине байланыштуу өзгөчө кырдаал жарыяланды

Кытайдын түштүгүндөгү Гуандун провинциясынын Цзянмэнь шаарында чиркейден жугуучу Чикунгунья безгегинин өсүшүнө байланыштуу 3-деңгээлдеги "калктын саламаттыгы боюнча өзгөчө кырдаал" жарыяланды. Бул тууралуу чет өлкөлүк басылмалар жазышты.

Маалым болгондой, 19-сентябрга чейин бул шаарда 1714 учур катталганы белгилүү болду.

Саламаттык сактоо органдарынын маалыматына караганда, учурлардын бардыгы жеңил өтүүдө, оор абалдагы бейтаптар же каза болгондор жок. Вирустун жайылышын токтотуу үчүн аймакта профилактикалык чаралар көрүлүүдө.

Маалымат үчүн: Чикунгунья - чиркей аркылуу жугуучу вирус, ал дене табынын көтөрүлүшү, муундардын шишиши жана оорушу менен коштолот. Ошондой эле бул дарт булчуң ооруларына, баш ооруга, жүрөк айланууга, чарчоого, теринин кызарышына алып келиши мүмкүн.