Жогорку Кеңештин комитети Чоңдорго билим берүү күнүн бекитүү жөнүндө токтом долбоорун колдоду

Бүгүн, 22-сентябрда парламенттин Социалдык саясат боюнча комитетинин жыйынында "Чоңдорго билим берүү күнүн бекитүү жөнүндө" Жогорку Кеңештин токтом долбоору каралып, колдоо тапты.

Ал долбоорду эл өкүлдөрү Жанар Акаев, Эльдар Абакиров, Чыңгыз Айдарбеков, Нилуфар Алимжанова, Азамат Исираилов, Айсулуу Мамашова, Гүлкан Молдобекова, Жумабек Салымбеков демилгелеген.

Жыйында баяндама жасаган демилгечилердин бири депутат Айсулуу Мамашова белгилегендей, токтом долбооруна ылайык 17-апрелди – жыл сайын белгиленүүчү Чоңдорго билим берүү күнү катары бекитилет.

"Үзгүлтүксүз окуу – жөн гана жаңы тренд эмес, келечектеги норма. Адамдар жаш курагына карабастан, өмүр бою жаңы нерселерди үйрөнүшү керек",- деди эл өкүлү.

Депутат Мамашова токтомдун алкагында министрлер кабинети жарандар үчүн тиешелүү иш-чараларды, семинарларды жана окуу курстарын өткөрүшү керектигин кошумчалады.