Украинада кулчулукта жүргөн 13 өзбекстандык бошотулду

Украинанын Киев облусунда өзбекстандык жарандарды күч менен жумушка мажбурлаган кылмыштуу топ кармалды. Бул тууралуу Украина Улуттук полициясы кабарлады.

Полициянын маалыматына караганда, бул схеманы Кытай жараны, Украинада убактылуу жашоого уруксат алган адам уюштурган. Ага дагы эки Кытай жараны, бир Тайланд жараны жана беш украиналык жардам берген. Уюштуруучулардын арасында бир өзбекстандык да бар экени айтылды.

Украинанын укук коргоо органдарынын маалыматы боюнча, аталган топ 13 өзбекстандыкты таап, аларга жогорку айлык сунуштаган. Бирок Украинага келген соң паспортторун алып, мыйзамсыз кармап турушкан жана Киев облусундагы эки агрардык ишканада күч менен жумушка мажбурлашкан.

Бул иш боюнча адам сатуу фактысы менен кылмыш иши козголуп, максималдуу жаза катары 12 жылга чейин эркинен ажыратуу көрсөтүлгөн. Кылмыштуу топту кармоо учурунда беш автоунаа, банктык карталар жана өзбек жарандарынын паспорттору табылган.

Өзбекстандын Тышкы иштер министрлиги 13 жарандын кулчулукта кармалышына байланыштуу Украинага нота тапшырды жана өзбекстандыктарга Украинанын аймагына баруудан алыс болууну сунуштады.

Азыркы учурда бошотулган өзбекстандыктар Киев облусундагы клиникалардын биринде медициналык көзөмөлдөн өтүшүүдө.