Индонезия президенти: "Палестина таанылса гана Израилди тааныйбыз"

Индонезия президенти Прабово Субианто өлкөсү Израилди Палестина мамлекетин тааныган учурдан тартып гана тааный турганын билдирди. Ал бул билдирүүнү БУУнун алдында өткөн "Палестина маселесине чечим табуу жана эки мамлекеттүү чечимди ишке ашыруу" боюнча жогорку деңгээлдеги конференцияда жасады.

Субианто бул куралдуу кагылыш башталгандан бери Газадагы чабуулдардан миңдеген жай тургундар, балдар курман болгонун айтып, бардык тараптарды Палестинаны таанууга, Газадагы гуманитардык кырсыкты токтотууга жана тынчтыкты камсыздоого чакырды.

Ал Франция, Канада, Австралия, Улуу Британия жана Португалия Палестинаны мамлекет катары таанып "тарыхтын туура тарабында турушат" деп белгилеп, Индонезия да тынчтык үчүн өз салымын кошууга даяр экенин кошумчалады.