Эдил Байсалов Эл артисти Замирбек Сооронбаевден кабар алды (фото)

23-сентябрь - Мамлекеттик тил күнүнүн урматына министрлер кабинетинин төрагасынын орун басары Эдил Байсалов Кыргыз маданиятына зор салым кошкон Эл артисти Замирбек Сооронбаевдин ден соолугун сурап үйүнө барды. Бул тууралуу Маданият министрлиги билдирди.

Жолугушуу маалында Эдил Байсалов улуу муун өкүлдөрүнүн эмгегин урматтоо, алардын чыгармачылык мурасын кийинки муунга жеткирүү мамлекеттин негизги милдеттеринин бири экенин белгиледи. Байсалов министрлер кабинетинин төрагасынын резервдик фондунун атынан Замирбек Сооронбаевге материалдык жардам тапшырып, анын кыргыз маданиятындагы ордун белгилеп, бекем ден соолук, узак өмүр, кажыбас кайрат каалады.

Өз кезегинде Замирбек Сооронбаев мамлекеттик деңгээлдеги колдоого ыраазычылыгын билдирип, төраганын орун басарына өз калемине таандык, басмаканадан жаңы чыккан китебине кол жазма калтырып, белек кылды.

Эске салсак, Кыргыз Эл артисти, театр жана кино актёру Замирбек Сооронбаев 2015-жылы Караколго болгон иш сапарында инсульт алып, 10 жылдан бери ден соолугун чыңдап үйүндө.